عصام عبد الفتاح كل شوية يقول باشتغل ببلاش.. ماشي.. قال إن حكام مصر بألف خير.. حلو.. وقال إن 10% بس من الحكام يصلحوا لإدارة المباريات.. ما قلنا كده من زمان (!)
ملوك الصالات الواحد صدّع من حكاية إن الزمالك ملك الصالات.. وبعدين تيجي تبص على الأرقام والبطولات تكتشف الآتي: حصل رجال الأهلي على 222 بطولة، وحصل رجال الزمالك على 156 بطولة.. حصل سيدات الأهلي على 184 بطولة، حصل سيدات الزمالك على (0) ولا بطولة.. يبقى الإجمالي = 406 بطولات للأهلي مقابل 156 بطولة للزمالك.. الفرق 250 بطولة بس (!)
الإسماعيلي راح فين؟! لسه موجود بس في المركز 17 (قبل الأخير).. يعني لسه بيعاني للموسم التاني مع إن الأهلي لم يقترب من لاعبيه.. يعني موضوع إن الأهلي بيستهدفه فعلاً أكذوبة وشماعة كبيرة جدًا.. على فكرة بداية الانتقالات بين الناديين كانت في منتصف التسعينيات، ساعتها الإسماعيلي ضم من لاعبي الأهلي: أحمد سامي، وأحمد رجب، ومحمد شرف، وأحمد سراج، وسامي قمصان، ومجدي طلبة (وكلها صفقات انتقال حر) وبعدها ضم روبرت أكوري بعد ما ساب الأهلي وراح المقاولون.
والأهلي رد وتعاقد مع خالد بيبو في صفقة انتقال حر.
وفي الألفية الجديدة الأهلي ضم: عماد النحاس (من النصر السعودي)، ومحمد بركات (من العربي القطري)، وإسلام الشاطر (من الزمالك)، وأحمد فتحي (من شيفيلد الإنجليزي)، وسيد معوض (من طرابزون سبور التركي)، وضم: محمد عبد الله وشريف عبد الفضيل وأحمد خيرى ومسعد عوض وكريم بامبو ومروان محسن (من الإسماعيلي مباشرة).
وباختصار.. الإسماعيلي ضم من الأهلي في العشرين سنة اللي فاتت 26 لاعبًا، وفي المقابل الأهلي ضم 16 لاعبًا معظمهم كانوا سابوا الإسماعيلي فعليًا.. وعايز تعرف مين دول.. دوّر واللي يسأل ما يتوهش.
