توالت ردود أفعال طارق يحيى مقدم برنامج “زملكاوى” على قرار منعه من دخول نادي الزمالك إلا بعد التحقيق معه على خلفية هجومه على اللجنة المؤقتة لإدارة ميت عقبة.
وقال يحيى: “بشكر كل زملكاوي وكل بني آدم حر ساندني وساند الكلمة اللي قولتها، بشكركم من كل قلبي، عاش الزمالك وعاش حبه في قلوبنا، عمرنا ما هنقدر نوفي حق جماهير الزمالك، ولا حق الزمالك علينا، نادي الزمالك عملنا وعملنا كتير جدًا، وكفاية إن إسمك يقترن بتاريخ نادي الزمالك، بشكر كل جماهير الزمالك، وكل من ساندني واتكلم عليا بكلام مش قادر أوصفه”.
وتابع طارق يحيى عبر قناة الزمالك: “من امبارح إلى النهارده عايش في مشاعر غير طبيعية، يمكن كنت بساعد فى تحقيق الزمالك للمكسب، في وقت من الأوقات، والفرحة اللي أنا فيها بسبب دعم الجماهير لموقفي تضاهي الفرحة اللي لما كنت بجيب هدف وأكسّب الزمالك.. وأكيد فيه ناس مع وناس ضد، ولابد أن تحترم المؤيد والمعارض، من يصطاد في الماء العكر مكشوفين، وأهدافهم خبيثة للنيل من استقرار الزمالك”.
واستكمل طارق يحيى حديثه قائلاً: “نادي الزمالك الآن في موقف صعب، وعمليات استقرار النادي واضحة للكل، والأخطر إن يكون الخطر من داخل النادي وليس خارجه، نداء لجماهير الزمالك.. خليكم على عهدكوا في دعم الكيان، واصبروا حتى تتضح الصورة، ومين المخلص ومين اللي بيساند ومين بيضر نادي الزمالك، لازم نكون صرحاء مع أنفسنا، لا نمتلك رفاهية الوقت حتى نهدره في الدخول في أزمات.. ادعم نادي الزمالك.. ادعم مدرسة الفن والهندسة عشان ترجع الفصول تتفتح تاني من جديد”.
وواصل: “أنا مستعد أبعد عن نادي الزمالك لو كانت هذه هي المصلحة، ولا أريد الدخول في تفاصيل، ولكن حضرتك منعت الجسد من دخول نادي الزمالك، ولكن عمرك ما هتعرف تمنع الروح أو تلغي البطولات والتاريخ المتواجدة في نادي الزمالك، كل فرد موجود في نادي الزمالك يراجع نفسه وينسى مصلحته الشخصية، لأن فيه مصلحة عامة مفروض أقولها حتى لو كانت على حسابي.. أنا بتكلم كمشجع زي الملايين، وبشعر دائما بمعاناة القميص الأبيض، هوا ده الفرق، وجماهير الزمالك هي من تدفع الثمن والمسئولية الأكبر على الإدارة”.
