وصلة من الهجوم الشرس أطلقها الإعلامي سيف زاهر على حسام عاشور، كابتن الأهلي السابق، وصفه فيها بأنه خرج من الباب الصغير وباع تاريخه مقابل الفلوس.
وهذه المرة انتقل زاهر إلى مقاعد الدماهير الحمراء، وقال في برنامجه “وان تو” بإذاعة أون سبورت: “كفاية يا عاشور لعب بالورق، خرجت من الباب الصغير وخسرت كل حاجة، لو عايز نصيحة يا تقول حاجة كويسة يا تسكت، ابعد عن الأهلي ومتتكلمش عن النادي تاني، رصيدك نفد يا عاشور، مش معمول عليك حملة زي ما قلت، ده شعور جمهور كبير حبك وكرهك بفضل تصرفاتك”.
وقال زاهر: “لازم أعتذر لجمهور الأهلي العظيم لأنه كان صح في أزمة حسام عاشور، كنت باخرج أدافع عنه وأقول للجمهور بلاش قسوة، وبشويش على الكابتن التاريخي”.
وأضاف: “حتى الزمالك كان محترم في الأزمة ورفض تسريبات عاشور بإن القلعة البيضاء تفاوضه، وقالوا مش عايزين مزايدة من اللاعب”.
وتابع سيف زاهر: “عاشور لاعب باع ناديه وتاريخه عشان الفلوس، تاريخه راح ورصيده راح، التاريخ يحسب بالالتزام وبالأخلاق وبحب الكيان، أنا أهلاوي بس بتكلم كإعلامي، الأهلي فوق رأس جميع محبيه، بس واضح إن الفلوس هي الأساس، عاشور مقالش جملة واحدة صح في كلامه، لست مقرباً من الخطيب حتى أدافع عنه ولكني برىء تماماً في أزمة عاشور”.
وأوضح سيف زاهر أن “الخطيب ومجلس الأهلي عملوا لعاشور اللي متعملش في تاريخ الأهلي”.
واختتم: “عماد متعب قد حسام عاشور 100 مرة وطلب من مجلس الأهلي مباراة اعتزال، الكابتن الخطيب قاله مش بنعمل مباريات بنشارك بس، ومع ذلك متعب لم يُهن إدارة الأهلي، ولم يتلفظ بلفظ واحد على كيان الأهلي، ولا الخطيب، وكذلك حسام غالي، لأنهم عارفين يعني إيه أهلي ويعني إيه الكيان”.
